สิขีสพฺพฆโสปิ จ วีณวโร, ปิสุณา มิตฺตเภทิกา นนฺที นที;
มุทุลกฺขณ โสทริยา จ มโน, วิส สาธุชิเตน ภวนฺติ ทสาติฯ
8. วรุณวคฺโค
71. วรุณชาตกํ
[71]
โย ปุพฺเพ กรณียานิ, ปจฺฉา โส กาตุมิจฺฉติ;
วรุณกฏฺฐ [วรณกฏฺฐ (สี. ปี.)] ภญฺโชว, ส ปจฺฉา มนุตปฺปตีติฯ
วรุณชาตกํ ปฐมํฯ
72. สีลวหตฺถิชาตกํ
[72]
อกตญฺญุสฺส โปสสฺส, นิจฺจํ วิวรทสฺสิโน;
สพฺพํ เจ ปถวิํ [ปฐวิํ (สี. สฺยา. ปี.)] ทชฺชา, เนว นํ อภิราธเยติฯ
สีลวหตฺถิชาตกํ ทุติยํฯ
73. สจฺจํกิรชาตกํ
[73]
สจฺจํ กิเรวมาหํสุ, นรา เอกจฺจิยา อิธ;
กฏฺฐํ นิปฺลวิตํ [วิปฺลาวิตํ (สี. ปี.)] เสยฺโย, น ตฺเวเวกจฺจิโย นโรติฯ
สจฺจํกิรชาตกํ ตติยํฯ
74. รุกฺขธมฺมชาตกํ
[74]
สาธู สมฺพหุลา ญาตี, อปิ รุกฺขา อรญฺญชา;
วาโต วหติ เอกฏฺฐํ, พฺรหนฺตมฺปิ วนปฺปตินฺติฯ
รุกฺขธมฺมชาตกํ จตุตฺถํฯ